കമന്റ് ഓപ്ഷന്‍ പൂട്ടിവെച്ച വാര്‍ളി ഗോമസുമായി അഭിമുഖം

ബ്ലോഗില്‍ കമന്റ് ബോക്സ് പൂട്ടിവെച്ച വാര്‍ളി ഗോമസുമായി നടത്തിയ അഭിമുഖത്തിന്റെ സംക്ഷിപ്ത രൂപമാണ്. താഴെ കൊടുത്തിരിക്കുന്നതു

വളരെ കഷ്ടപ്പെട്ടതിനു ശേഷമാണു അഭിമുഖത്തിനുവേണ്ടി പത്തു മിനിറ്റ് എന്റെ കൂടെ ചെലവഴിക്കാമെന്നു വാര്‍ളി സമ്മതിച്ചത് . അദ്ദേഹം ഒരു ദിവസം തന്നെ അഞ്ചും പത്തും പോസ്റ്റുകള്‍ തയ്യാറാക്കുന്നതിന്റെ തിരക്കിലായിരുന്നു

മനസറിയാതെ : വാര്‍ളീ താങ്കള്‍ എന്തുകൊണ്ടാണ് ബ്ലോഗിലെ കമന്റ് ഓപ്ഷന്‍ ലോക്ക് ചെയതത്

വാര്‍ളി : അതു ചോദിക്കാന്‍ നീയാരാ. എനിക്കു ബ്ലോഗ് പൂര്‍വികരായി കൈമാറിയതോ ഭാര്യ വീട്ടില്‍ നിന്നു സ്ത്രീധനം കിട്ടിയതൊ അല്ല , കയ്യീന്നു കാശുമുടക്കി ഡൊമൈന്‍ റെജിസ്റ്റെര്‍ ചെയ്തു ഉണ്ടാകിയതാ അതുകൊണ്ട് എന്റെ ബ്ലോഗില്‍ ഞാന്‍ എനിക്കു തോന്നിയതു ചെയ്യും . നീ വേണേല്‍ വന്നു വായിച്ചു പോടേ . അല്ലെങ്കില്‍ തന്റെ പണി നോക്കടോ .എന്റെ ബ്ലോഗ് വെറും കൂതറ ബ്ലോഗ് ആണു വെറും കൂതറ (ബ്ലോഗ് എഴുതുന്ന ആളോ..?)

മനസറിയാതെ : ഞാന്‍ ഒരു പത്രപ്രവര്‍ത്തകനാണു ഞാന്‍ എന്റെ പണിതന്നെയാണു ഇപ്പോള്‍ ചെയ്യുന്നതു

വാര്‍ളി : പത്രമോ!!!! അതെന്താ....?

മനസറിയാതെ : നിങ്ങള്‍ ജോലിചെയ്യുന്നതും പത്രത്തില്‍ തന്നെയാണ്

വാര്‍ളി : ഓ പത്രം അഹങ്കാരം കൊണ്ട് വന്നവഴിയൊക്കെ മറന്നു നില്‍ക്കുന്ന ഇടവും

മനസറിയാതെ : അപ്പോ അഹങ്കാരമൊക്കെ ഉണ്ടല്ലേ

വാര്‍ളീ : എന്നുവെച്ചു അഹങ്കാരമുള്ളതിന്റെ അഹങ്കാരമൊന്നും എനിക്കില്ല , എങ്ങിനെ ഞാന്‍ അഹങ്കരിക്കാതിരിക്കും , ഞാന്‍ ബ്ലോഗിലെ മെഗസ്റ്റാര്‍ അല്ലെ ,എന്റെ തിരുവായക്കു എതിര്‍വായയുണ്ടൊ ബൂലോകത്ത്, ഞാന്‍ എന്തു പറഞ്ഞാലും അതാണു ശരി ഇനി ആരെങ്കിലും എതിര്‍ത്താല്‍ തന്നെ ഒരു പോസ്റ്റിട്ടുകൊണ്ട് അവനെ നാണംകെടുത്തിവിടും. അതുകൊണ്ട് എന്നെ എതിര്‍ക്കുന്നവര്‍ അനോണിയായെ എതിര്‍ക്കാറൊള്ളു

മനസറിയാതെ : നിങ്ങളുടെ ബ്ലോഗ് വായിക്കുന്നവരെ അല്‍പം ബഹുമാനിച്ചുകൂടേ

വാര്‍ളീ : ഞാന്‍ എന്തിനു ബഹുമാനിക്കണം ഞാന്‍ ബ്ലോഗിലെ മെഗാസ്റ്റാര്‍ ആണു .. പിന്നെ ഞാന്‍ വിളിച്ചിട്ടൊന്നുമല്ലല്ലോ വായിക്കാന്‍ വരുന്നതു വലിഞ്ഞുകയറി വരുന്നതല്ലെ. അവര്‍ എന്റെ വായിലിരിക്കുന്നതു കേള്‍ക്കാന്‍ ബാധ്യസ്തരാണു

മനസറിയാതെ : വായനക്കാര്‍ ഉള്ളതു കൊണ്ടാണു നിങ്ങള്‍ ഇങ്ങനെ പ്രശസ്തനായത്

വാര്‍ളി : വായനക്കരില്ലെങ്കിലും ഞാന്‍ പ്രശസ്തന്‍ തന്നെയാണു.. വായനക്കാര്‍ വിവരദോഷികള്‍ അല്ലെങ്കില്‍ എന്റെ പോസ്റ്റിനു നിലവാരമില്ലാ എന്നു കമന്റ് ഇടുമോ, എന്റെ പോസ്റ്റുകള്‍ എല്ലാം മഹത്തരമാണ്. അതു മോശമാണെന്നു മറ്റുള്ളവര്‍ പറയുംമ്പോളുള്ള ചൊറിച്ചില്‍ മാത്രമാണു എനിക്കുള്ളത് (വായില്‍ നിന്നു ഇങ്ങനെ ഒരു വാചകം അറിയാതെ വീണു പോയി)

മനസറിയാതെ : ഇനി കമന്റ് ഓപ്ഷന്‍ തുറക്കാന്‍ ഒരു സധ്യതയുമില്ലെ

വാര്‍ളി : എല്ലാ ബ്ലോഗര്‍മാരും എന്റെ എല്ലാ പോസ്റ്റിനും മഹത്തരം എന്ന് കമന്റ് ഇടുമെന്നു മുദ്രപ്പത്രത്തില്‍ എഴുതി തന്നാല്‍ തീര്‍ച്ചയായും കമന്റ് ഓപ്ഷന്‍ തുറക്കുന്നതായിരിക്കും

ഇത്രയും പറഞ്ഞതിനു ശേഷം തന്റെ പോസ്റ്റുകള്‍ പഴപോലെ ഏല്‍ക്കുന്നില്ല എന്നു പറയുന്നവര്‍ വെറും മൂരാച്ചികളാണെന്ന് പിറുപിറുത്തുകൊണ്ട് അദ്ദേഹം എഴുന്നേറ്റ് പോയി .